Tramp Netanyahuya Qəzza zolağı və Livandakı əməliyyatları dəstəklədiyini açıqladı
ABŞ prezidentliyinə Respublikaçılar Partiyasından namizəd Donald Tramp İsrailin Baş naziri Benyamin Netanyahu ilə söhbətində yəhudi dövlətinin hərbçilərinin Qəzza zolağı və Livandakı əməliyyatlarını dəstəklədiyini açıqlayıb.
Redaktor.az xəbər verir ki, bu barədə mənbələrə istinadən “The Washington Post” məlumat yayıb.
Nəşrin mənbələrindən birinə görə, Tramp bu ay telefon danışığı zamanı Netanyahuya "etməli olduğunuzu edin" dedi. Qəzet həmçinin senator Lindsey Grahamdan sitat gətirib ki, Tramp “Netanyahuya hərbi cəhətdən nə edəcəyini söyləməyib, lakin Livanın şiə təşkilatı Hizbullah üzvlərinin istifadə etdiyi peycerlərdən təsirləndiyini” deyib.
Bundan əvvəl Tramp Pensilvaniyada tərəfdarlarının mitinqində çıxış edərək, İsrailin Yaxın Şərq münaqişəsində mövqeyini yaxşılaşdırdığını, çünki Netanyahunun Amerika lideri Co Bayden və onun administrasiyasının göstərişlərinə məhəl qoymadığını bildirmişdi.
Amerika jurnalistikasının veteranı, "The Washington Post" qəzetinin redaksiya heyətinin üzvü Bob Vudvord oktyabr ayında ABŞ-dəa satışa çıxarılan yeni kitabında Baydenin şəxsi söhbətlərində Netanyahunu “lənətə gəlmiş yalançı” adlandırdığını qeyd edib. Xüsusilə, İsrail Qəzza zolağında Rəfahda hərbi əməliyyata başlayanda Bayden Netanyahuya “heç bir strategiyasının olmadığını” söyləyib. Netanyahunun digər hərəkətləri də Amerika liderinin qəzəbli reaksiyalarına səbəb olub.
Turan İSMAYIL
Bizi Telegram-da izləyin...
