Rekord məbləğə torpaq satışı reallaşdı - 520 milyon DOLLAR
ABŞ-ın Florida ştatında, Mayaminin maliyyə bölgəsindəki sahil yaxınlığında yerləşən 1,7 hektar torpaq sahəsi 520 milyon dollara satılıb.
Redaktor.az xəbər verir ki, bu bölgənin tarixində ən böyük torpaq satışı olaraq qeydə alınıb.
Torpaq sahəsi "Apartment Investment & Management Co." tərəfindən "Oak Row Equities" şirkətinin qurucuları Erik Ratter və David Veytsin idarə etdiyi bir təşkilata satılıb. Sözügedən mülk maliyyə şirkətləri və yeni sakinlərin axını ilə son illərdə inkişaf edən Brickell məhəlləsinin mərkəzində yerləşir.
Şirkətin bəyanatına görə, torpaq üçün ödənəcək məbləğ bəzi maliyyələşdirmə şərtlərindən asılı olaraq 540 milyon dollara qədər arta bilər. Bu satış, 2022-ci ildə milyarder Ken Qriffinə edilən 363 milyon dollarlıq rekord satışı geridə qoyur.
Yeni sahiblərin açıqlamasına görə, bu torpaq ultra lüks yaşayış komplekslərinin inşaası üçün istifadə ediləcək. Mövcud olaraq ofis qülləsi və mənzil mülkünə ev sahibliyi edən bu sahə, Biskayne körfəzi istiqamətində 148 metr uzunluğunda maneəsiz su mənzərəsinə sahibdir. Ərazidə 320 metr hündürlüyə qədər bir neçə qüllə tikmək üçün icazə mövcuddur.
Brickell məhəlləsi yüksək tələbatı və rəqabətli kirayə qiymətləri ilə tanınır. "CBRE Group Inc." tərəfindən yayımlanan hesabatda bölgədə ofis boşluq nisbəti 2023-cü ilin sentyabr ayı sonuna 11,9 faiz təşkil edib ki, bu da ABŞ üzrə orta göstəricidən (19 faiz) xeyli aşağıdır.
Torpaq alqı-satqısının 2024-cü ilin mart ayında tamamlanması planlaşdırılır.
Bizi Telegram-da izləyin...
