Prezident Ərdoğan hörmət etdiyim bir insandır - Tramp
ABŞ-nin seçilmiş prezidenti Donald Tramp, Türkiyə Prezidenti Rəcəb Tayyib Ərdoğanla bağlı açıqlama verərkən Türkiyə Prezidenti Ərdoğanın onun dostu və hörmət etdiyi bir insan olduğunu, eyni zamanda Ərdoğanın da ona hörmət etdiyini düşündüyünü deyib.
Redaktor.az xəbər verir ki, Florida ştatında yerləşən Mar-a-Lago iqamətgahında keçirdiyi mətbuat konfransında Donald Tramp, xarici siyasətlə bağlı fikirlərini bölüşüb.
Ötən prezidentlik dövründə müharibələrdən uzaq durduğunu xatırladan Tramp, Suriyadakı ABŞ qoşunlarını geri çəkmək planları ilə bağlı açıqlamalarında Türkiyənin strateji əhəmiyyətini vurğulayıb.
Tramp, ilk prezidentlik dövründə Suriyada İŞİD-ə qarşı mübarizədə uğur qazandığını və əsgərlərin əksəriyyətini geri çağırdığını bildirib. Günümüzdə bölgədəki vəziyyətlə bağlı suala cavab verərkən isə Türkiyənin vacib roluna diqqət çəkib.
Suriyadakı təxminən 2 min Amerika əsgərinin geri çəkilməsi məsələsinə dair suala Tramp belə cavab verib: "Bunu sizə açıqlamayacağam, çünki bu, hərbi strategiyanın bir hissəsidir. Ancaq onu deyə bilərəm ki, bu məsələ Türkiyə ilə bağlıdır".
Prezident Ərdoğanın əhəmiyyətini bir daha vurğulayan Tramp, onunla dost olduğunu və qarşılıqlı hörmətə əsaslanan münasibətlərə sahib olduqlarını ifadə edib.
Seymur BƏNNAYEV
Bizi Telegram-da izləyin...
