8 yaşlı Narin Güran cinayəti ilə bağlı hökm AÇIQLANDI
Türkiyənin Şəhərində 8 yaşlı Narin Güranın qətlinə görə məhkum olunan 4 təqsirləndirilən şəxsə verilən cəzalarla bağlı qərar tamamlanıb. Diyarbəkir 8-ci Ağır Cəza Məhkəməsi tərəfindən hazırlanan 944 səhifəlik qərarda hadisənin təfərrüatları və təqsirləndirilən şəxslərin cinayətləri ətraflı şəkildə izah edilib.
Redaktor.az xəbər verir ki, məhkəmənin qərarına əsasən, Narin Güranın anası Yüksel Güran, qardaşı Enes Güran və əmisi Salim Güran "uşağa qarşı qəsdən adam öldürmə" cinayətində iştiraklarına görə ağırlaşdırılmış ömürlük həbs cəzasına məhkum edilib.
Mərhumun meyitini gizlətdiyini etiraf edən Nevzat Bahtiyar isə "cinayət sübutlarını gizlətmə, məhv etmə və ya dəyişdirmə" cinayətinə görə 4 il 6 ay həbs cəzası alıb.
Məhkəmənin qərarında vurğulanıb ki, təqsirləndirilən şəxslər Narin Güranın ölümünə bilərəkdən mane olmayıb, onu xilas etmək imkanı olduğu halda bu müdaxiləni etməyərək hadisəyə şərait yaradıblar.
Hadisənin təfərrüatları araşdırmalar və ifadələr əsasında sübuta yetirilib. Meyitin gizlədilməsi ilə bağlı təqsirləndirilən şəxslərin birgə hərəkət edərək cinayəti ört-basdır etməyə çalışdığı da müəyyən olunub.
Xatırladaq ki, məhkəmə 28 dekabr 2024-cü ildə keçirilmiş iclasda qərar çıxarıb və təqsirləndirilənlərin cəzalandırılmasına qərar verib.
Kənan YUSİF
Bizi Telegram-da izləyin...
