Avropa dövlətləri Ukraynanı NATO-ya üzv olaraq görmək istəyir - ŞƏRH
ABŞ Prezidenti Donald Tramp jurnalistlərə açıqlamasında Ukraynanın NATO-ya üzv olmaq istəyinin müharibənin başlamasına rəvac verdiyini qeyd edib.
“Ukrayna NATO-ya üzvlüklə bağlı məsələni artıq unutmalıdır”,- deyə Amerika lideri bildirib.
Trampın fikirləri Ukraynanın NATO-ya üzv olmaq istəyinə təsir edəcəkmi?
Mövzu ilə bağlı Redaktor.az-a danışan politoloq Samir Hümbətov bildirdi ki, Trampın Ukraynanın NATO-ya üzvlüklə bağlı məsələsinə aydınlıq gətirməsi, erkən verilmiş açıqlama kimi dəyərləndiririlir:
"Ola bilsin ki, Amerika Birləşmiş Ştatları Ukraynanın NATO-ya üzvlük məsələsində veto qoymaq imkanına malikdir. Amma Trampın hakimiyyəti 4 ildir. 4 ildən sonra o hakimiyyətdən gedəcək. Ukraynanın NATO-ya üzv olmaması məsələsində belə mövqe bildirmək, fikrimcə, erkən verilmiş açıqlamadır. Trampın dediklərinin əksinə olaraq Avropa dövlətləri Ukraynanın NATO-ya üzv olaraq görmək istəyir. Əgər bir dövlət veto qoyursa, ölkə üzvlüyə qəbul ola bilmir. Mən düşünürəm ki, bunu Trampdan sonrakı dövrdə də edə bilərlər. Vaxtı o zamana qədər uzada bilərlər".
Politoloq qeyd etdi ki, Amerika Birləşmiş Ştatları özü NATO-dan çıxmağı planlayır.
"Əgər bu baş verəcəksə, digər dövlətlər Ukraynanı öz sıralarında görməyə çalışacaqlar.
Heç bir vəziyyətdə Ukraynanı NATO-dan uzaqlaşdırmaq fikrini mən qəbul etmirəm. Ukrayna NATO-ya daxil olmasa belə, NATO-ya üzv olan, istər Fransa, Böyük Britaniya, Almaniya və s. onlar Ukrayna ilə yüksək səviyyəli bir əməkdaşlıq müqaviləsi imzalayıb, NATO üzvünə verilən imtiyazlar qədər Ukraynaya dəstək verə biləcəklərini düşünürəm", - deyə S.Hümbətov vurğuladı.
Aytəkin TOFİQQIZI
Bizi Telegram-da izləyin...
