Tramp Dövlət Departamentinin işçilərini ixtisar etmək istəyir
ABŞ prezidenti Donald Tramp, Dövlət Departamentinin strukturunu köklü şəkildə dəyişdirməyi və işçi sayını əhəmiyyətli dərəcədə azaltmağı planlaşdırır.
Redaktor.az bu barədə "Politico" nəşrinə istinadla məlumat verir.
Tramp, daha az diplomat və səfirliklə, Dövlət Departamentinin fəaliyyətini məhdudlaşdırmağı hədəfləyir. Planlaşdırılan islahatlar çərçivəsində, diplomatik xidmətin yalnız hökumət sazişləri, təhlükəsizlik məsələləri və xarici investisiyaların təşviqi kimi sahələrə fokuslanacağı gözlənilir. Bu yanaşma, demokratiya və insan haqları kimi məsələləri təbliğ edən şöbələrin ixtisar edilməsi və ya ləğv edilməsini nəzərdə tutur.
Həmçinin, müxtəlif ölkələrdəki səfirliklərin bağlanması planları üzərində də müzakirələr gedir. Məsələn, Fransadakı Rennes, Lyon və Strasburq şəhərlərindəki səfirliklərin bağlanması nəzərdə tutulur. Tramp, Dövlət Departamentinin xarici siyasətini “öncə Amerika” prinsipinə uyğun şəkildə yenidən formalaşdırmağı və ABŞ-ın suverenliyini gücləndirməyi hədəfləyir.
Aytəkin TOFİQQIZI
Bizi Telegram-da izləyin...
