Rusiya DİN-də Əcnəbilərin Vətəndaşlıq və Qeydiyyatı Xidməti yaradılacaq
Rusiya Prezidenti Vladimir Putin Daxili İşlər Nazirliyinin tərkibində Vətəndaşlıq və Xarici Vətəndaşların Qeydiyyatı Xidmətinin yaradılması barədə qərar verib.
Redaktor.az xəbər verir ki, nüvafiq fərman Kremlin saytında dərc olunub.
“Miqrasiya sahəsində dövlət idarəçiliyini təkmilləşdirmək məqsədilə Rusiya Federasiyası Daxili İşlər Nazirliyinin Miqrasiya Məsələləri Baş İdarəsinin bazasında Rusiya Federasiyası Daxili İşlər Nazirliyinin Xarici Vətəndaşların Vətəndaşlığı və Qeydiyyatı Xidmətinin yaradılması barədə qərar qəbul edirəm”, - sənədin mətnində deyilir.
Eyni fərmanla Putin hökumətə üç ay müddətində Rusiya Federasiyasının daxili işlər orqanlarının və Daxili İşlər Nazirliyinin mərkəzi aparatının maksimum ştat həddinin dəqiqləşdirilməsi, prezidentin aktlarının bu fərmana uyğunlaşdırılması ilə bağlı təkliflərin hazırlanması və öz aktlarının ona uyğunlaşdırılması ilə bağlı təkliflər verməyi tapşırıb. Hökumət həmçinin üç ay müddətində bu sənədin icrası ilə bağlı xərclərin maliyyələşdirilməsini təmin etməlidir.
Daxili işlər naziri Vladimir Kolokoltsevə üç ay müddətində müvafiq təşkilati tədbirlərin həyata keçirilməsini təmin etmək tapşırılıb.
Fərman imzalandığı gündən qüvvəyə minir.
Yeni yaradılan xidmətin rəhbəri Andrey Kikot nazirin birinci müavini statusunda olacaq. "Andrey Vladimiroviç Kikot Rusiya Federasiyası daxili işlər nazirinin birinci müavini - Rusiya Federasiyası Daxili İşlər Nazirliyinin Vətəndaşlıq və Xarici Vətəndaşların Qeydiyyatı Xidmətinin rəisi vəzifəsinə təyin edilsin, o, hazırkı vəzifəsindən azad edilsin", - sərəncamda deyilir.
2017-ci ildən Kikot Rusiya Federasiyası Baş Prokurorunun müavini vəzifəsini tutur.
Rusiya Prezidenti vurğulayıb ki, miqrasiya vəziyyəti ölkə sakinləri üçün rahat olmalıdır. Qeyri-qanuni miqrasiyaya qarşı mübarizə tədbirlərinin işlənib hazırlanması Rusiya Federasiyası Təhlükəsizlik Şurasının sədr müavini Dmitri Medvedevin rəhbərlik etdiyi Rusiya Federasiyası Təhlükəsizlik Şurasında xüsusi idarələrarası komissiya tərəfindən həyata keçirilir.
Turan İSMAYIL
Bizi Telegram-da izləyin...
