Tramp niyə Rusiya və daha 3 ölkəyə rüsum tətbiq etməyib? - Ağ Ev AÇIQLADI
ABŞ Prezidenti Donald Tramp Rusiya, Belarus , Kuba və Şimali Koreyaya ticarət tarifləri tətbiq etməyib , çünki bu ölkələr artıq ABŞ sanksiyalarına məruz qalıb.
Redaktor.az xəbər verir ki, bu barədə Ağ Evin mətbuat katibi Karolin Levitt "Axios" ilə söhbətində bildirib.
"Rusiya Vaşinqtonun tariflər tətbiq etdiyi ölkələr siyahısına daxil edilməyib , çünki ABŞ sanksiyaları artıq “hər hansı bir mənalı ticarəti istisna edir” - deyən Levitt bildirib ki, Kuba, Belarus və Şimali Koreya bu siyahıya daxil edilməyib, çünki onların üzləşdiyi tariflər və sanksiyalar artıq çox yüksəkdir.
Ağ Evin mətbuat katibi əlavə edib ki, Moskva hələ də “əlavə sərt sanksiyalarla” üzləşə bilər.
Qeyd edək ki, bir gün əvvəl ABŞ Prezidenti Donald Tramp idxal rüsumlarının yeni sistemini tətbiq edib. Baza dərəcəsi bütün idxal olunan mallar üzrə 10%, ayrı-ayrı ölkələr üçün isə əhəmiyyətli dərəcədə yüksək olacaq: Çin üçün 34%, Vyetnam üçün 46% və Avropa İttifaqı üçün 20% .
Amerikanın “The Wall Street Journal” qəzeti aprelin 3-də yazıb ki, ABŞ idxal mallarına yeni rüsumlar tətbiq etməklə, yaratdığı dünya ticarət nizamını pozur, qeyri-müəyyənlik dövrünə qədəm qoyur.
"Eyni zamanda, rüsumlar ABŞ iqtisadiyyatının özünə mənfi təsir göstərə bilər" - qəzet iddia edir. Belə ki, tarif rejiminin uzadılması ilə ölkədə inflyasiya 2025-ci ilin fevralında qeydə alınan 2,5%-dən ilin sonuna kimi 4,4%-ə yüksələ bilər.
Turan İSMAYIL
Bizi Telegram-da izləyin...
