"Şahmat taxtası qatili" üstü açılmamış daha 11 qətl haqqında danışmağa HAZIRDIR
"Şahmat taxtası qatili", “Bitsevski manyakı” kimi tanınan rusiyalı qatil Aleksandr Piçuşkin ömürlük məhkumlar üçün koloniyada 17 il keçirdikdən sonra üstü açılmamış daha 11 qətl haqqında ifadə verməyə hazır olduğunu bildirib.
Redaktor.az Rusiya KİV-ə istinadən xəbər verir ki, bu barədə Rusiya Cəzaların İcrası Federal Xidmətinin mətbuat bürosu məlumat yayıb.
"A.Piçuşkin Moskvanın Şimali Butovo rayonunda 11 qətl törətməsi barədə etiraf ifadələri verməyə hazır olduğunu bildirib", - məlumatda qeyd edilib.
50 yaşlı Aleksandr Piçuşkin 2008-ci ildən ömürlük məhkumlar üçün xüsusi rejimli koloniyada cəza çəkir. O, 2006-cı ilin yayında Bitsevski parkı ərazisində qətllər törədən manyakın təxminən bir il davam edən axtarışlarından sonra saxlanılıb.
Moskva şəhər məhkəməsi 2007-ci il oktyabrın 29-da A.Piçuşkini 48 qətldə və üç qətl cəhdində təqsirli bilib. O, əsasən kişilərə hücum edirmiş. Lakin qurbanları arasında üç qadın da olub. A.Piçuşkin qətlləri 1992-ci ildə və 2001-2006-cı illərdə törədib. O bildirib ki, 60 nəfəri öldürüb və ümumilikdə 64 qətl törətmək niyyətində olub. Çünki şahmat taxtasında 64 kvadrat var. Etiraf edib ki, öldürdüyü hər bir insan üçün şahmat taxtasının bir xanasına xətt çəkirmiş.
Bizi Telegram-da izləyin...
