Polşa Almaniya ilə sərhədi bağlamağa hazırdır - Baş nazir
Berlin miqrantları Polşa ərazisinə qovmağa çalışarsa, Polşa Almaniya ilə sərhədi bağlamağa hazırdır.
Redaktor.az xəbər verir ki, bu barədə Polşanın Baş naziri Donald Tusk "TVP Info" telekanalının efirində bildirib.
"Sərhədi bağlamağa hazır olacağam. Mən almanlara dedim: Əgər siz bizə miqrant göndərməyə cəhd etsəniz, mən sonda Aİ-nin fəaliyyətinə dair Müqavilənin 72-ci maddəsinə müraciət edəcəyəm ki, bu maddəyə əsasən təhlükəsizlik səbəbi ilə icma daxilində öhdəliklərin yerinə yetirilməsini müvəqqəti dayandırmaq mümkün olacaq”, - o əlavə edib.
Bundan əlavə, Tusk Brüssel nümayəndələrinin razılaşmanın bütün dövlətlər tərəfindən həyata keçiriləcəyi ilə bağlı bəyanatlarına baxmayaraq, Polşanın Aİ Miqrasiya Paktının digər Aİ ölkələrindən miqrantların qəbulu tələbləri ilə bağlı müddəalarına əməl etmək niyyətində olmadığını təsdiqləyib.
Qeyd edək ki, 16 sentyabr 2024-cü il tarixindən qeyri-qanuni miqrasiyanın azaldılması məqsədilə Almaniya Federativ Respublikasının bütün quru sərhədlərində müvəqqəti nəzarətlər tətbiq edilib. Berlin deyir ki, belə bir addımın səbəbləri, həmçinin daxili təhlükəsizliyi islamçı terrorizm və transsərhəd cinayətin yaratdığı təhdidlərdən qorumaqdır. Bəzi qonşu ölkələr, o cümlədən Polşa Almaniya hakimiyyətinin qərarını qeyri-dost addım hesab edib.
Turan İSMAYIL
Bizi Telegram-da izləyin...
