Günəş enerjisi 2050-yə qədər dünyanın enerji ehtiyacının 60%-ni ödəyə bilər - Araşdırma
ABŞ- nin Massaçusets Texnologiya İnstitutu (MIT) və Almaniyanın Fraunhofer İnstitutunun birgə apardığı yeni araşdırmaya əsasən, günəş enerjisi 2050-ci ilə qədər dünya üzrə ümumi enerji istehlakının təxminən 60%-ni qarşılayacaq potensiala malikdir.
Redaktor.az xəbər verir ki, tədqiqat “Nature Energy” jurnalında dərc olunub.
Mütəxəssislər bildirirlər ki, texnologiyada baş verən sürətli inkişaf, panellərin qiymətinin azalması və dövlətlərin yaşıl enerjiyə keçidi sürətləndirməsi bu proqnozu daha real edir. Araşdırmada 100-dən artıq ölkədə günəş radiasiyası, torpaq əlverişliliyi və enerji infrastrukturunun inkişaf səviyyəsi analiz olunub.
“Əgər dövlətlər karbon emissiyalarını azaltmaq və enerji müstəqilliyini təmin etmək istəyirsə, günəş enerjisinə ciddi şəkildə investisiya etməlidir,” – deyə layihənin rəhbəri, professor Erik Şnayder qeyd edib.
Araşdırma həmçinin göstərir ki, ən çox potensiala malik regionlar arasında Şimali Afrika, Orta Asiya və Cənubi Amerika ön plandadır. Bu isə gələcəkdə enerji ixracatçısı olan ölkələrin dəyişə biləcəyini göstərir.
Hazırda dünya üzrə elektrik enerjisinin təxminən 12%-i bərpa olunan mənbələrdən, onun da 3.6%-i günəş enerjisindən əldə olunur. Lakin mövcud templə davam edərsə, 25 ildən az müddətdə bu rəqəmlər dramatik şəkildə dəyişə bilər.
Nuriyyə NATİQQIZI
Bizi Telegram-da izləyin...
