Britaniya Hindistanla azad ticarət sazişi imzaladı
İyulun 24-də Böyük Britaniya və Hindistan böyük bir azad ticarət sazişi imzalayıblar.
Redaktor.az "BBC" telekanalına istinadla xəbər verir ki, Britaniyanın Baş naziri Kir Starmer bu razılaşmanı "tarixi gün" və "Britaniya üçün böyük qələbə" kimi qiymətləndirib.
İmzalanma mərasimindən sonra çıxış edən Baş nazir sazişin iş yerlərini artıracağını, biznes imkanlarını genişləndirəcəyini və Böyük Britaniyada iqtisadi inkişafa təkan verəcəyini deyib. O əlavə edib: “Hindistanla əlamətdar ticarət sazişimiz Britaniya üçün böyük qələbədir. Bu, Böyük Britaniyada minlərlə iş yeri yaradacaq, bizneslər üçün yeni imkanlar açacaq və ölkənin hər yerində böyüməyə təkan verəcək. Biz zəhmətkeş britaniyalıların cibinə daha çox pul qoyuruq və ailələrə yaşayış xərclərini ödəməkdə kömək edirik, həmçinin iqtisadiyyatı inkişaf etdirmək və həyat standartlarını yüksəltmək üçün daha da sürətlə irəliləməkdə qərarlıyıq”.
Hindistanın Baş naziri Narendra Modi Böyük Britaniya və Hindistanı “təbii tərəfdaşlar” adlandırıb və iki ölkənin ortaq tarixində yeni bir səhifə açıldığını bildirib.
Razılaşmanın şərtlərinə əsasən, Hindistanın Böyük Britaniya mallarına orta tarifi 15 faizdən 3 faizə enəcək. Alkoqolsuz içkilər və kosmetikadan tutmuş avtomobillərə və tibbi cihazlara qədər müxtəlif məhsulların Britaniya ixracatçılarının Hindistan bazarına çıxışı hər iki ölkəyə əhəmiyyətli dərəcədə fayda verəcək.
Britaniya viskisinə tariflər isə birdən-birə 15 faizdən 75 faizə endiriləcək, sonra isə növbəti onillikdə daha 40 faiz aşağı salınacaq. Bu, Böyük Britaniya istehsalçılarına qlobal rəqiblər üzərində əhəmiyyətli üstünlük verəcək.
Böyük Britaniya hökumətinin bəyanatına görə, saziş yeni investisiya və ixracatda təxminən 6 milyard funt-sterlinq (8 milyard dollardan çox) qazanc yaradacaq. Hindistan firmaları Böyük Britaniyada əməliyyatlarını genişləndirəcək. Qarşı tərəfin sahibkarları isə Hindistanda yeni biznes sahələrinin yaradılması fonunda ölkə daxilində 2200-dən çox britaniyalı üçün iş yerləri yaradacaq.
Bizi Telegram-da izləyin...
