Ermənistanda diplomat həbs edildi - Azərbaycana işləyirmiş
Ermənistan mətbuatında ölkənin diplomatik korpusu ilə bağlı qalmaqallı hadisə barədə məlumat yayılıb.
Redaktor.az xəbər verir ki, “Hraparak” qəzetinin yazdığına görə, təxminən iki ay əvvəl Ermənistanın diplomatik nümayəndəliyində çalışan bir şəxs hava limanında saxlanılıb.
Avstriyada Ermənistanın konsulluğunda fəaliyyət göstərmiş Aşxen Aleksanyan adlı diplomatın Ermənistana qayıdarkən saxlanıldığı və üzərindən sənədlər götürüldüyü bildirilir. İddialara görə, Aleksanyan Azərbaycanın xeyrinə casusluqda şübhəli bilinir.
Qəzet yazır ki, hadisədən dərhal sonra Ermənistan Milli Təhlükəsizlik Xidməti (MTX) bir gün ərzində XİN binasında axtarış aparıb, kompüterlərə baxış keçirilib və sənədlər incələnib. Lakin məsələ ictimaiyyətə açıqlanmayıb, çünki bunun böyük diplomatik qalmaqala səbəb ola biləcəyi düşünülüb.
Mənbənin iddiasına görə, Aşxen Aleksanyan əvvəlcə dövlət qulluqçusu kimi fəaliyyət göstərib, sonra isə XİN-in konsulluq idarəsinə keçib və diplomat rütbəsi alıb. Onun sonrakı fəaliyyəti barədə açıq mənbələrdə məlumat mövcud deyil.
Qəzet həmçinin yazır ki, Aleksanyanın həbsi ilə bağlı bütün rəsmi məlumatlar və hətta onun təyinatı barədə xəbərlər internetdən silinib.
Bizi Telegram-da izləyin...
