"İranda etirazçıların törətdiyi vəhşiliklər görünməmiş idi"
İranda etirazçılar tərəfindən törədilən zorakılıqlar görünməmiş səviyyədədir və hətta İslam Dövləti yaraqlılarını da üstələmişdir.
Redaktor.az xəbər verir ki, bunu İranın Ermənistandakı səfiri Xəlil Şirqolami mətbuat konfransında bildirib.
Səfirin sözlərinə görə, “İranda polis məmurlarının başının kəsilməsi və təhlükəsizlik qüvvələrinin diri-diri yandırılması halları baş verib. İnsanların başına atəş açmaq təlimatlarını eşidə biləcəyiniz videolar var”.
Diplomat əlavə edib ki, kütləvi zorakılıqlar xaricdə təlim keçmiş yaraqlılar tərəfindən törədilib və onların hərəkətlərində ABŞ və İsrailin əli görünür. Şirqolaminin sözlərinə görə, yəhudi dövləti İranı parçalamaq istəyir.
Səfir həmçinin bildirib ki, Tehran xarici aktyorlarla danışıqlara hazırdır, lakin bunlar qarşılıqlı hörmət və əsas normalara riayət olunmasına əsaslanmalıdır. Qeyd olunur ki, İranın xarici işlər naziri Abbas Əraqçi yaxın günlərdə ABŞ Prezidentinin xüsusi elçisi Stiv Vitkovla danışıqlar aparıb, həmçinin Fars körfəzi ölkələrindən biri İran-ABŞ danışıqlarının təşkili üçün addımlar atıb.
Şirqolami vurğulayıb ki, ABŞ Prezidenti hər gün yeni bir açıqlama verə bilməz və qərar verməlidir. Lakin Vaşinqton maraqlı olarsa, İran real danışıqlara hazırdır.
Aminə ŞAHSUVARQIZI
Bizi Telegram-da izləyin...
