Alimlər beyin metastazlarına qarşı yeni immun hüceyrələr HAZIRLADI
Ueyk-Forest Universitetinin Tibb Məktəbinin alimləri ağciyər xərçənginin ən təhlükəli fəsadlarından biri olan beyinə metastazları ilə mübarizə aparmaq üçün xüsusi immun hüceyrələri hazırlayıblar.
Redaktor.az xəbər verir ki, tədqiqatın nəticələri "Nature Biomedical Engineering"(NBE) jurnalında dərc olunub.
Komanda modifikasiya olunmuş immun hüceyrələri "CAR" makrofaqları (CARMAC) hazırlayıb. Bu hüceyrələr beyinə nüfuz edə, xərçəng hüceyrələrini tanıya və şişin böyüməsini doklinik modellərdə ləngidə bilir. Makrofaqlar təbii şəkildə hematoensefalik baryeri keçə bildiyindən, bu, əksər dərmanların daxil ola bilmədiyi beyinə şişə qarşı elementlərin çatdırılması üçün onları əlverişli “nəqliyyat sistemi”nə çevirir.
Tədqiqatçılar makrofaqları ağciyər xərçəngi hüceyrələri üçün xarakterik olan mezotelin zülalını hədəfləyən ximer antigen reseptoru (CAR) ilə təchiz ediblər. Şişə qarşı təsiri gücləndirmək məqsədilə makrofaqların təbii “hücum” mexanizmlərini aktivləşdirən MyD88 siqnal komponenti də əlavə olunub.
Laboratoriya və heyvan modellərində karma hüceyrələri şiş ocaqlarına uğurla nüfuz edib, xərçəng hüceyrələrini udub və metastazların böyüməsini ləngidib. Bundan əlavə "MyD88-CAR" hüceyrələri şiş nekrozu faktoru alfa kimi siqnal molekullarını ifraz edib ki, bu da qonşu xərçəng hüceyrələrinin zədələnməsinə imkan verib. Siçanlar üzərində aparılan təcrübələrdə "CAR" makrofaqlar şişin inkişafını ləngidib və minimal toksiklik fonunda onların ömür müddətini artırıb.
Alimlər qeyd edirlər ki, beyində metastazlar ağciyər xərçəngi olan hər üç xəstədən birində yaranır və mövcud müalicə üsulları məhduddur. Karma hüceyrələri beynin təbii baryerlərini aşa bilən daha təhlükəsiz və effektiv immunoterapiya üsulunun tətbiqi üçün yeni imkanlar açır.
Tədqiqat müəllifləri Karma texnologiyasının daha da təkmilləşdirilməsini və metodun effektivliyi ilə təhlükəsizliyini insanlar üzərində yoxlamaq üçün klinik sınaqlara hazırlığı planlaşdırırlar.
Xədicə BAXIŞLI
Bizi Telegram-da izləyin...
