Türkiyə Qara dənizdə təhlükəsizlik məsələsində güzəştə getməyəcək
Türkiyədə NATO planlarına uyğun olaraq zərurət yarandıqda yerləşdiriləcək qoşunları əlaqələndirmək və idarə etmək üçün regional korpus komandanlığı yaradılacaq.
Redaktor.az xəbər verir ki, bu barədə Türkiyə Müdafiə Nazirliyinin sözçüsü Ankarada jurnalistlər üçün keçirdiyi brifinqdə bildirib.
Sözçü qeyd edib ki, “NATO planlarında ölkəmizin müdafiəsini NATO qüvvələri ilə əlaqələndirəcək və zərurət yarandıqda yerləşdiriləcək qüvvələr üzərində komandanlıq və nəzarəti həyata keçirəcək Türk Korpusu (TKK) üçün regional qərargahın yaradılması nəzərdə tutulur. Milli hakimiyyət orqanları bu qərargahı çoxmillətli bir quruma çevirməyi məqsədəuyğun hesab ediblər. Qərargahın yaradılması üzərində işlər davam edir; yalnız əsas heyət təyin edilib və çoxmillətli qərargahın statusu hələ təsdiqlənməyib”.
Müdafiə Nazirliyi əlavə edib ki, “dəniz əməliyyat zonalarında planları həyata keçirmək üçün 2024-cü il üçün beş birgə əməliyyat qüvvəsi – Atlantik, Şimal, Baltik, Aralıq dənizi və Qara dəniz – yaradılması planlaşdırılırdı”.
Həmçinin bildirilib ki, “ölkəmiz 2028-ci ilə qədər Qara Dəniz Əməliyyat Qüvvələrinin (CTF Black) qərargahına komandanlıq edəcək və ev sahibliyi edəcək. 2028-ci ildən sonra qərargaha komandanlıq edəcək ölkə Qara dəniz sahil müttəfiqlərimizin – Rumıniya və Bolqarıstanın təklifləri əsasında müəyyən ediləcək”.
Nazirlik vurğulayıb ki, komandanlıq strukturları “Türkiyənin təhlükəsizlik ehtiyaclarına və Qara dənizlə bağlı siyasi mövqeyinə uyğun olaraq yaradılır”.
Aminə ŞAHSUVARQIZI
Bizi Telegram-da izləyin...
