ABŞ NATO müttəfiqlərindən hərbi hesabat tələb edəcək
ABŞ iyul ayında Ankarada keçiriləcək NATO sammitində müttəfiq ölkələrdən hərbi xərclərin və silah istehsalının artırılması ilə bağlı hesabat tələb edəcək.
Redaktor.az xəbər verir ki, bu barədə ABŞ-nin NATO-dakı daimi nümayəndəsi Metyu Uitaker "Fox News" telekanalına açıqlamasında bildirib.
Onun sözlərinə görə, Donald Tramp administrasiyası NATO-nun əsas müdafiə prinsiplərinə qayıtmasını prioritet hesab edir.
“Prezident Donald Trampın rəhbərliyi altında NATO döyüş köklərinə qayıdır. Müttəfiqlər hərbi xərclərin ÜDM-in 5 faizinə çatdırılması ilə bağlı öhdəliklərini real imkanlara çevirməlidirlər. Bu yay keçiriləcək Ankara sammiti həmin öhdəliklərin praktik nəticələrinin qiymətləndirilməsi olacaq”, - deyə Uitaker vurğulayıb.
Xatırladaq ki, NATO-nun hərbi xərclərin ÜDM-in 2 faizi həcmində olması ilə bağlı hədəfi 2014-cü ildə Böyük Britaniyada keçirilən sammitdə qəbul olunmuşdu və bunun 10 il ərzində yerinə yetirilməsi nəzərdə tutulurdu.
2024-cü ilə qədər alyansın 32 üzvündən 22-si bu göstəriciyə nail olub.
2025-ci ilin iyun ayında Haaqa şəhərində keçirilən NATO sammitində isə Avropa ölkələrinin müdafiə xərclərinin 2034-cü ilə qədər ÜDM-in 5 faizinə çatdırılması barədə qərar qəbul edilib.
Analitiklər hesab edirlər ki, ABŞ-nin NATO üzvlərinə təzyiqi alyans daxilində müdafiə yükünün daha bərabər bölüşdürülməsinə yönəlib.
Aminə ŞAHSUVARQIZI
Bizi Telegram-da izləyin...
