Qadın itirdiyi üzüyü 28 il sonra gölün dibində TAPDI
ABŞ-də qadın 28 il əvvəl itirdiyi məktəb məzuniyyət üzüyünə gözlənilmədən qovuşub.
Redaktor.az xəbər verir ki, bu barədə UPI məlumat yayıb.
İki amerikalı xəzinə axtarış həvəskarı Nyu-York ştatındakı Qreyt-Sakandaqa gölünün ərazisində metal detektorları ilə axtarış apararkən cihazdan siqnal alıblar. Daşı qaldırdıqda onun altında 1988-ci ildə Red Creek High School-u bitirən məzuna məxsus metal üzük aşkarlayıblar.
Axtarış aparanlardan Dilan LaPort bildirib ki, metal detektoru siqnal verdikdən sonra daşı çeviriblər və üzüyü orada görüblər.
Maykl Siql və Dilan LaPort tapdıqları üzüyün fotosunu sosial şəbəkələrdə paylaşaraq sahibini axtarmağa başlayıblar. Bir neçə cəhddən sonra nəticə əldə etmədikləri üçün məktəblə əlaqə saxlayıblar. Məktəbin katibi qısa müddətdə üzüyün keçmiş şagird Kim Rasbekə məxsus olduğunu müəyyənləşdirib.
Məlum olub ki, Kim üzüyü 28 il əvvəl dostları ilə göl kənarında istirahət etdiyi zaman itirib. O, xatirə əşyasını geri almaq üçün poçt xərcləri və digər ödənişləri qarşılamaya hazır olduğunu bildirib.
Lakin üzüyü tapan şəxslər ondan pul qəbul etməkdən imtina ediblər.
Məlumata görə, Siql və LaPort itirilmiş zinət əşyalarını metal detektorları vasitəsilə axtarmağı və tapdıqları əşyaları sahiblərinə qaytarmağı hobbi halına gətiriblər.
NURİYYƏ
Bizi Telegram-da izləyin...
