35 yaşlı xəstənin ürəyindən 36 mm-lik iynə ÇIXARILDI
Çində sidiyində qan şikayəti ilə xəstəxanaya müraciət edən 35 yaşlı əqli məhdudiyyətli şəxsin ürəyində 36 millimetr uzunluğunda tikiş iynəsi aşkarlanıb.
Redaktor.az xəbər verir ki, xəstənin həyati göstəriciləri normal olub. Həkimlər döş qəfəsinin rentgen müayinəsi zamanı ürək nahiyəsində şübhəli kölgə müşahidə ediblər.
Aparılan əlavə müayinələr nəticəsində xəstənin sidik kisəsində, qarın divarında və çanaq nahiyəsində də metal yad cisimlər müəyyən edilib.
Məlum olub ki, ürəyin ətrafındakı maye ilə dolu kisəni deşən 36 millimetrlik iynənin ucu sol mədəciyin boşluğuna qədər uzanıb.
Hunan Əyalət Xalq Xəstəxanasının həkimləri iynənin yer dəyişdirməsi, toxumaları zədələməsi və ya infeksiyaya səbəb olması riskini nəzərə alaraq onun cərrahi yolla çıxarılmasına qərar veriblər.
Sidik kisəsində aşkar edilən iynələrin üzərində isə daşlaşmış qabıqlar müşahidə olunub. Cərrahiyyə qrupu ilk olaraq ürəkdəki iynəni çıxarıb, sidik kisəsindəki iynələr isə daha sonra əməliyyatla götürülüb.
İynələrin xəstənin bədəninə necə daxil olduğu dəqiq müəyyən edilməyib. Həkimlər bunun qəsdən özünə xəsarət yetirmə davranışı ilə bağlı ola biləcəyini bildiriblər.
Xəstənin tibbi tarixçəsində də oxşar halın olduğu məlum olub. İki il əvvəl onun qarın nahiyəsindən iynəyə bənzər iki yad cisim çıxarılıb.
Bizi Telegram-da izləyin...
