ABŞ bu ölkəyə 48 ədəd “F-35” SATACAQ
ABŞ hökuməti Səudiyyə Ərəbistanına 24,3 milyard dollara 48 ədəd “F-35” gizli qırıcı təyyarəsinin satışını təsdiqləyib.
Redaktor.az “LeMonde.fr”ə istinadla xəbər verir ki, bu, Yaxın Şərqdə davam edən münaqişə fonunda əldə edilən böyük bir razılaşmadır. ABŞ qanunvericiliyinin tələb etdiyi kimi, Dövlət Departamenti Konqresi təklif olunan satış barədə məlumatlandırıb və bu satış indi ABŞ qanunvericiləri tərəfindən təsdiqlənməlidir. Bəziləri, əsasən, bu təyyarənin qabaqcıl texnologiyasının Çinə sızdırıla biləcəyindən narahat olduqları üçün satışa qarşı çıxırlar. Dövlət Departamentinin satış üçün əsaslandırmasında bildirilir ki, təklif olunan satış Səudiyyə Ərəbistanının milli müdafiəsini gücləndirmək və ABŞ qüvvələri ilə qarşılıqlı fəaliyyətini təkmilləşdirməklə mövcud və gələcək təhdidlərin qarşısını almaq qabiliyyətini artıracaq. Bu təyyarələrin faktiki təhvilinin bir neçə il ərzində baş tutacağı gözlənilir. Səudiyyə Ərəbistanı bu açıqlamanı alqışlayıb və Vaşinqtondakı səfirliyi bildirib ki, “F-35”lərin təklif olunan satışı Səudiyyə Ərəbistanı ilə ABŞ arasında strateji tərəfdaşlığın gücünü, davamlılığını eləcə də müdafiə əməkdaşlığımızın inkişafını nümayiş etdirir.
Qeyd edək ki, Ər-Riyad uzun müddətdir ki, F-35-lər əldə etməyə çalışırdı, lakin regionda bu təyyarələri idarə edən yeganə ölkə olan İsrail qəti şəkildə etirazlarını bildirirdi.
Bizi Telegram-da izləyin...
