Seçkilərdən üç gün əvvəl minlərlə israilli Netanyahuya qarşı mitinq keçirdi
İsraildə keçiriləcək növbədənkənar parlament seçkilərinə cəmi üç gün qalmış Təl-Əvivdə Baş nazir Binyamin Netanyahu hökumətinə qarşı minlərlə insanın iştirakı ilə kütləvi etiraz aksiyası keçirilib.
Redaktor.az AFP agentliyinə istinadən xəbər verir ki, bu mitinq Netanyahuya olan xalq dəstəyinin ciddi sınağı kimi qiymətləndirilir.
Aksiya 7 oktyabr 2023-cü ildə HƏMAS hücumu zamanı həlak olanların və girov götürülənlərin ailələrini birləşdirən "Oktyabr Şurası" tərəfindən təşkil olunub. Etirazçılar Rabin meydanından "Girovlar meydanı"na doğru yürüş edərək, həmin dövrdə baş verən təhlükəsizlik uğursuzluqlarını araşdıracaq müstəqil dövlət komissiyasının yaradılmasını tələb ediblər.
Mitinqdə müxalifət liderləri, o cümlədən Netanyahunun əsas rəqiblərindən biri olan keçmiş Baş Qərargah rəisi Qadi Eisenkot da iştirak edib. Eisenkot çıxışında Netanyahunun İsrailin beynəlxalq təcridi fonunda təklif etdiyi "alternativ rəqəmsal iqtisadiyyat" ideyasını sərt tənqid edərək, bunu baş nazirin ləqəbinə eyhamla "bbCoin" adlandırıb və bu kursun ölkənin yüksək texnologiyalar sektorunu məhv edəcəyi ilə bağlı xəbərdarlıq edib.
Qeyd edək ki, Netanyahu hökuməti müstəqil istintaq komissiyasının yaradılmasından imtina edir və tərkibi siyasətçilərdən ibarət olacaq alternativ qurum təklif edir. Müxalifət isə bu təklifi qətiyyətlə rədd edir.
KAN ictimai yayımçısının son rəy sorğularına əsasən, oktyabrın 27-nə təyin edilmiş seçkilərdə gərgin mübarizə gözlənilir. Eisenkotun bloku 120 yerlik Knessetdə 52, Netanyahunun bloku isə 50 mandat qazana bilər ki, bu da heç bir tərəfin təkbaşına çoxluq təşkil edə bilməyəcəyini göstərir.
Aminə ŞAHSUVARQIZI
Bizi Telegram-da izləyin...
