Braziliyada hava şəraiti səsverməni çətinləşdirir
Braziliyada keçirilən prezident seçkilərinin ikinci turunda səsvermə prosesi ölkənin bir sıra bölgələrində davam edən əlverişsiz hava şəraiti fonunda baş tutur.
Redaktor.az TASS agentliyinə istinadən xəbər verir ki, səhər saatlarından başlayaraq Rio-de-Janeyro şəhərində və ölkənin cənub-şərq vilayətlərində şiddətli yağışlar müşahid olunur.
Rio-de-Janeyroda baş verən kəskin daşqınlar şəhərin bir neçə hissəsində nəqliyyatın hərəkətində ciddi axsamalara səbəb olub. Məlumata görə, hava şəraiti ilə əlaqədar seçki məntəqələrində sıxlıq və uzun növbələr qeydə alınmır, seçicilər yağışın kəsməsini və hava şəraitinin nisbətən düzəlməsini gözləməyə üstünlük verirlər.
Xatırladaq ki, prezident seçkilərinin ilk turunda keçmiş dövlət başçısının oğlu Flavio Bolsonaro səslərin 47.04 faizini toplayaraq hazırkı prezident Luis İnasio Lula da Silvanı (45.15%) geridə qoymuşdu. Namizədlərdən heç biri ilk turda 50 faizlik həddi aşa bilmədiyi üçün dövlət başçısının adı məhz bu gün keçirilən ikinci tur səsverməsində dəqiqləşəcək.
Qeyd edək ki, səsvermə ərəfəsində Lula da Silvanın seçki qərargahı ABŞ-nin "Meta" şirkətini Braziliyadakı seçki prosesinə qanunsuz müdaxilə etməkdə ittiham etmişdi.
Aminə ŞAHSUVARQIZI
Bizi Telegram-da izləyin...
